LUI LETTA
My suster is die luiste mens
Wat jy jou kan verbeel;
Heeldag kry ons werkies tuis:
Vir haar is al's te veel!
As ma vir Letta gou uitstuur,
Hoor jy haar net brom:
"Hoekom kan Mieta dan nie gaan,
Ek moet maar altyd kom!"
Letta was te lui vir werk,
Te lui om iets te doen,
So lui en vet het sy geword -
So dik soos 'n pampoen!
Haar luiheid was al vér bekend
En orals waar sy gaan,
Sê al die mense wat haar sien:
"Daar kom Lui Letta aan!"